سياسةمحليات لبنانية

كلن يعني كلن.. وانا وانت منهن!

 

 

تلقت "الحوار نيوز" هذا الصباح رسالة بالعامية غير مذيلة بأي توقيع. ونظرا لواقعيتها ننشر النص كالتالي: 

 

خيي حامل الهوية اللبنانية، الله يعطيك العافية والقوة عاللي عم تعمله هالإيام، وانشالله بتوصل وبتوصلنا معك لكل المطالب المنشودة، وبتسجل علامة فارقة بكتب التاريخ.

بس انا عندي كلمتين حابب قلك ياهن، يمكن يفيدوك بهيدي الثورة، بعيدا عن المواضيع السياسية والحزبية اللي صارت كتير متداولة مؤخرا.

عزيزي الللبناني فيه أولوية ناسيها بالليستا تبع "كلن يعني كلن" … اللي هي إنت … ايه خيي إنت أولا وآخرا لازم تثُور على نفسك وتطالب نفسك بتحسين نفسك، ومش قصدي تتخطى حزبك وزعيمك وطايفتك وهالحكي لا، حقلك شو قصدي:

ثُور عنفسك لما تكب زبالتك من سيارتك بكل وقاحة.

ثُور عنفسك لما بدا تكون سواقتك عالطرقات حيونة.

ثُور عنفسك لما السرعة القصوى مش معبرها وما شايف الا الضو الأخصر.

ثُور عنفسك لما ما بتحترم صف الإنتظار.

ثُور عنفسك لما ترشي أو ترتشي.

ثُور عنفسك لما تستكتر ألفين ليرة عشوفار تكسي معتر، وما تتردد تحط ١٠ الاف ليرة بخشيش بمطعم محشى مصاري.

ثُور عنفسك لما تتحرش بحِجة إنك شب وإنه لِبسها جبرك.

ثُور عنفسك لما تشَعل سيغارتك وقارمة " ممنوع التدخين" قد راسك عالحيط قدامك.

ثُور عنفسك لما تمارس شغف الصيد بين البيوت وتقلق العالم وتترك وراك زبالتك وخرطوشك بالأرض.

ثُور عنفسك لما تشَغل أجنبي بحِجة إنه أرخص.

ثُور عنفسك لما تتكبر عالناس لأي سبب كان، وتعتبر حالك الفهمان بكل شي وبعد الله دغري.

ثُور عنفسك لما تاكل حق عَرق الجبين، بحِجة إنك حربوق.

ثُور عنفسك لما طريقك للنجاح بده يلحقه طمس نجاحات غيرك.

ثُور عنفسك لما تكذب وتنصب وتنهب وتخون وتقتل …

ثُور عنفسك وعأخلاقك يا خيي … لأنه كل هالثورة اللي قايم فيها عالحكم بس تنجح انشالله، ما رح يكون الها طعمة اذا ما عندك أخلاق وحس العيش ضمن مجموعة، وخصوصوخصوصا بس تعرف انك موقت بهيدي الدني مش باقي من أثرك إلا صيتك وأفعالك.

#ثُور_عنفسك
#كلن_يعني_كلن_وأنا_وإنت_واحد_منهن

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى