غادة حيدر – الحوارنيوز
قالوا الحرف من عنّا، من بلاد الجمال،
بلاد الحب والحرف لصنعت أدونيس من ثلج ونار.
من زمان كتير قالوا لبنان الأرز،
ولبنان العشق والدوا، نوافذ الضو بسحرا الوجع.
واليوم بإختصار قبل ما يقطع الزمان
طلع الطلال يحكيلنا قصة بيت،
بيت بغابر الزمان خلّا الكلمة
متل حبة الماس
وكل حبة منها بتحكي سيرة العمران والأديان والإنسان،
وقبلها وقبل اللي كان،
خلّا الحرف يصير إنسان، والكلمة تصير إله، وشو الخالق غير كلمة حب ودعوة صدق؟
هالطلال لوحده ما منّو اتنين،
وكأنه متل إله بذاته وبحروفه
اللي زرعت بساتينا بصوت بيشبه
هوا جرس طلال…
جرس طلال اللي إتكأ
على زنده وقلها يا بعلبك،…
يا بعلبك إنتي وأنا
ما عنا وقت ننام،
إذا غمضت عيني يا بعلبك
غطيني وخليني ع دراجك
إتدفى
بحضن غنّية قلتها بصوت
ملاك، ملاك إسمه فيروز،
يمكن طلال قصد يجمع الماس والفيروز
هيك بيمرق الزمان
وبيبقى هوي هون
أسطورة لآخر الزمان.
* جرى قبل ظهر اليوم إحتفال تكريم للشاعر طلال حيدر في مسرح كركلا، حرش تابت، بيروت، بدعوة من وزير الاعلام زياد مكاري وكانت كلمة الإفتتاح للمايسترو عبد الحليم كركلا، تلتها كلمة للأستاذ محمد مطر، كلمة للشاعر شوقي بزيغ، كلمة للفنان مارسيل خليفة، وكلمة الوزير زياد مكاري،
وحضرت التكريم وجوه ثقافية وفنية وإعلامية.
